आपट्याचं पान म्हणजे सोनं – श्रद्धा, समृद्धी आणि स्नेह यांचा शुभ प्रतीक. दसऱ्याच्या पूजेसाठी सजलेलं हे ताट मनाला भावतं. दसरा : विजयाचा उत्सव, मनाचा आत्मविश्वास दसरा आला की मनात एक वेगळीच ऊर्जा संचारते. लहानपणी दसरा म्हणजे शाळेची सुट्टी, पाटी आदल्या दिवशी स्वच्छ घासून, धुवून आणि पुसून त्यावर सरस्वती चित्र काढले जायचे आणि सरस्वती मातेची पूजा केली जायची.आईच्या हाताच्या पुरणपोळ्या, आणि शेजारच्या मंडळात फुलं वाटण्याचा आनंद. पण जसजसं वय वाढलं, तसतसं या सणाचा अर्थ खोल होत गेला. आता दसरा म्हणजे केवळ रावणाचा वध नव्हे, तर आपल्या मनातील अंधारावर मिळवलेला विजय. दसऱ्याची पार्श्वभूमी रामाने रावणाचा वध करून सत्य आणि धर्माचा विजय साजरा केला. म्हणूनच या दिवसाला "विजयादशमी" म्हणतात. पण याच दिवशी अपराजिता देवीची पूजा केली जाते—ती शक्तीचं प्रतीक आहे, जी कधीही पराभूत होत नाही. महाभारतात अर्जुनाने आपली शस्त्रं शमीच्या झाडात लपवली होती, आणि दसऱ्याच्या दिवशी ती पुन्हा घेऊन युद्धात उतरला. म्हणूनच शमीचं पूजन म्हणजे ज्ञान, शक्ती आणि विजयाची कामना. दसऱ्यात आपट...